O lesona taitasi i le tusi lesona a le tagata aoao o le EnglishConnect ua vaevaeina i ni vaega se lua: 1) Suesuega Faaletagata Lava Ia ma le 2) Vaega o Talanoaga. O le vaega o Suesuega Faaletagata Lava Ia e saunia ai oe mo lau Vaega o Talanoaga. E aofia ai se mataupu faavae o le aoao e suesue, lisi o upu e tauloto, ma faatulagaga o fuaiupu e aoao ai.

E mafai foi ona e faaaogaina le api galuega ma le upega tafailagi a le EnglishConnect e faataitai ai le gagana Peretania i aso taitasi. O le faaaogaina pea o nei punaoa o le a fesoasoani ia te oe e vave ai ona e aoaoina le gagana Peretania.

O tomai lelei faa-Peretania e mafai ona faalautele ai ou avanoa mo aoaoga, galuega, ma auaunaga.

• Aoga: Maua avanoa faaleaoaoga e pei o le BYU-Pathway Worldwide.
• Galuega: Ia agavaa oe mo ni galuega e sili atu ona lelei.
• Auaunaga: Faalautele mea e mafai ona e faia mo isi. Mo se faataitaiga, e mafai ona avea oe o se faiaoga o le EnglishConnect 1 po o le 2 e fesoasoani i isi e aoao le gagana Peretania.
  

O loo i lalo sootaga faaupega tafailagi e sue ma auai ai i se vaega:

• Resitalaga mo le EnglishConnect 1 ma le 2
• Resitalaga mo le EnglishConnect 3

EnglishConnect 1 ma le 2
O le tele lava o vaega e potopoto faatasi pe faalua i le vaiaso, ae o lesona e tusia ina ia mafai ona feiloai soo ai vaega pe a manaomia. E 25 lesona i tulaga taitasi ma o lesona taitasi e 60–90 minute le umi.

EnglishConnect 3
E faatasi i le vaiaso ona potopoto vaega. E 7 lesona ma e 90 minute le umi o lesona taitasi.

Faailoa atu i lou faiaoga pe afai e manaomia ona e misia se faatasiga ma faaauau pea ona agai i luma e ala i le sauniuni mo le isi lesona. Afai e te mafaia, toe iloilo le lesona na e misia pe faataitai faatasi ma se tagata o le vaega i fafo atu o le potopotoga. O le a e maua foi avanoa e toe iloilo ai a o e agai atu i luma.

Ioe. E mafai ona e toe faia soo se tulaga o le EnglishConnect. O nisi tagata aoao o le a mananao e toe fai se tulaga e ausia ai a latou sini o suesuega pe faateleina ai lo latou loto toa.

Faafesootai lou faiaoga o le EnglishConnect mo se fesoasoani.

E te le manaomia se poto masani faafaiaoga e avea ai ma se faiaoga o le EnglishConnect. Atonu e te le'i aoaoina muamua lava le gagana Peretania ma e te le'i mautinoa pe faapefea ona amata. E le afaina lena. O lesona EnglishConnect ua tuufaatasia ma le faaeteete ma le mafaufau lelei e faaaoga ai mataupu faavae o le aoaoina atu o gagana ma mataupu faavae faaleagaga e fesoasoani ia te oe ia faamanuiaina. E le tau avea oe ma se tagata atamai. E te le tau iloa le tali i fesili uma. O lau matafaioi o le faafaigofieina lea o le atiinae o gagana e ala i le tuuina atu o avanoa mo le faataitaiina. E te le tau aoaoina le kalama pe malamalama i mea uma e uiga i le gagana Peretania. Ae ia taulai atu i le fausia o se siosiomaga e lagona ai e tagata aoao le toafimalie e tautatala faaPeretania ma aoao mai a latou mea sese.

O le aoaoina o le gagana Peretania e faaaoga ai na o le gagana Peretania ua taatele i le lalolagi atoa. O le mea moni, e mafai ona avea lenei mea ma se faamanuiaga aua e faateleina ai le tele o le gagana Peretania e faalogo ma faaaoga e tagata aoao. Manatua e tautala i le gagana Peretania faafaigofie. Faaaoga mea faitino, taga o lima, ma gagana o le tino e fesoasoani ai i tagata aoao ia malamalama i upu fou ma faatulagaga o fuaiupu. E mafai ona e faaali atu se ata, tusi se ata, pe faatino. E mafai ona e faasino tagata aoao i punaoa ua faaliliuina i le EnglishConnect 1 mo Tagata Aoao po o le EnglishConnect 2 mo Tagata Aoao, pe mafai foi ona e faaaogaina se tusi o upu ma latou uiga i luga o le initaneti. O le a aoaoina ai foi tagata aoao i le auala e faaaoga ai punaoa o loo maua e saili ai tali. Aloese mai faamalamalamaga uumi. Ae ia faaali atu i tagata aoao le mea e fai e ala i le faasino.

Manatua o loo outou aoao faatasi. Valaaulia e le aunoa tagata aoao e liliu atu i le Alii mo se lagolago. I le avea ai ma o latou faiaoga, e mafai ona avea oe ma se faataitaiga o le faatuatua ma taumafaiga. O le tautala faaPeretania ma tagata aoao o se faatinoga o le faatuatua. O le a faamanuiaina oe ma tagata aoao e le Alii a o e galue i le faatuatua e tautala faaPeretania.

O le a sili ona e fesoasoani i tagata aoao pe a e taulai atu i le tautala faaPeretania i le vaega atoa o talanoaga. E mafai ona e faia lenei mea e ala i le avea o se faataitaiga. Ia fai le mea sili e te mafaia e tautatala ai na o le gagana Peretania. Faaaoga upu faigofie ma fuaiupu pupuu. Tautala lemu ma toe fai soo fasifuaitau. Tusi upu autu ma fasifuaitau i luga o le laupapa. E mafai foi ona e faaaogaina se ata, tusi se ata, pe faatino. Aloese mai faamalamalamaga uumi ma faaliliu mea uma e te fai atu ai. Afai e tatau ona e faaaogaina le gagana moni, fesili muamua i le faatagaga ma faaaoga le gagana moni i le mea itiiti e mafai ai ona toe foi lea i le gagana Peretania. Uunaia tagata aoao e tautatala faaPeretania i le tele latou te mafaia ma aua le fefefe e faia ni mea sese. Fesoasoani ia i latou ia maua le manuia, ma viia taumafaiga uma. Afai e manaomia e tagata aoao nisi fesoasoani, faasino i latou i tusi lesona a tagata aoao, lea e mafai ona latou maua ai anomea i a latou lava gagana. A o e taulai atu i le fesoasoani i tagata aoao e aoao e ala i le faataitai, o le a faaitiitia lou manaomia ona faaaoga le gagana moni.

O le aoaoina o se vaega e tele gagana o se avanoa matagofie lea e uunaia ai le tautatala faaPeretania aua o le gagana Peretania o le gagana masani lea i le vaega. I le avea ai ma se faiaoga, faaaoga le lomiga faa-Peretania o le tusi lesona a le tagata aoao. Fesoasoani i tagata aoao e faaaoga le tusi lesona a le tagata aoao i le latou lava gagana, pe afai e maua, ina ia mafai ona latou penefiti mai le faaliliuina. Afai e mafai, tuu tagata aoao i ni vaega toalaiti e talanoaina le mataupu faavae o le aoaoina i a latou lava gagana, ae ia mautinoa e leai se tasi e faaesea. Afai e na o le tasi le tagata e tautala i se gagana faapitoa i le vaega, fai atu i lena vaega e talanoaina le mataupu faavae o le aoaoina i le gagana Peretania faigofie ina ia aofia uma ai.

Ina ia aoao le gagana Peretania, e manaomia e tagata aoao ona atiinae se mausa o le faataitai i aso taitasi. Uunaia tagata aoao e faatulaga lenei mausa e ala i le sailia o ni auala faigofie e faaaoga ai le gagana Peretania i a latou gaoioiga i aso taitasi (tagai i le vaega o le "Faataitaiga i Aso Taitasi"). Mo se faataitaiga, e mafai e tagata aoao ona filifili e matamata i ata pe faalogologo i musika i le gagana Peretania. E mafai ona e uunaia tagata aoao e faaaoga le lisi o manatu e faaleleia ai suesuega i aso taitasi e maua pe a maea le "Siaki mo Suesuega Faaletagata Lava Ia" i le folasaga o le tusi lesona a le tagata aoao. Faaaoga le lisi lenei e musuia ai tagata aoao e saili ni auala eseese, ma anoa e faataitai ai i aso taitasi.

I le taimi o le fonotaga a le vaega, valaaulia tagata aoao e suesue ma faataitai le gagana Peretania i aso taitasi ma tulitatao a latou taumafaiga. E mafai ona e fai atu i ni nai tagata aoao e faasoa mai ni mea patino sa latou faia mo faataitaiga i aso taitasi. Atonu e te mafaufau e faia se avanoa i luga o le initaneti, e pei o se talanoaga faalevaega, mo tagata aoao i le vaega. Fefautuaai ma ou taitai e saili ni auala talafeagai e fesoasoani ai i le vaega ia fesootai pea i le gasologa o le vaiaso e ala i feau tusitusia i vaega po o isi auala. E mafai ona e lagolagoina tagata aoao a o latou galulue e ausia a latou sini, ae ia manatua, o i latou lava e nafa ma a latou lava aoaoga.

Fefautuaai ma taitai o le Ekalesia i le lotoifale e faia ni faaiuga e uiga i le faatulagaina ma le faafoeina o vaega o le EnglishConnect. I le tulaga lelei, e toalua faiaoga matutua e tofia i vaega taitasi. Mafaufau i manaoga o tagata aoao ma le malosiaga faalotoifale a o e faia filifiliga e uiga i nofoaga, faatulagaga, ma le vave.

O lesona EnglishConnect e mafai ona faasolo mai le 60 i le 90 minute. Mulimuli i vaega o taimi o loo lisiina mo gaoioiga taitasi. Aua le aveesea soo se gaoioiga; na o le faaaogaina lava o le taimi itiiti ua fautuaina mo se fonotaga puupuu a le vaega ma faaaoga le taimi umi ua fautuaina pe a faatagaina e le taimi.

Manatua: Fefautuaai ma i latou o loo vaavaaia le polokalama ma mafaufau i manaoga o tagata aoao ma le malosi faalotoifale a o e faia nei faaiuga.

I le masani ai, e faatasi i le vaiaso ona potopoto vaega. Afai e manaomia, e mafai ona feiloai soo ia vaega. Ina ia sili atu ona aoga faatasiga a vaega, e manaomia ona lava le taimi o tagata aoao i le va o faatasiga e faamaea ai le vaega o le "Suesuega Faaletagata Lava Ia".

E 25 lesona o le EnglishConnect 1 ma le 2. Afai e fono faatasi vaega i le vaiaso, e ono masina e faamaea ai le tulaga e tasi. Afai e faalua i le vaiaso ona potopoto le vaega, e tolu masina e faamaea ai. Afai e manaomia, e mafai ona e vaevaeina le polokalama i ni vaega laiti, po o ni fasi mataupu. Mo se faataitaiga, e mafai ona e filifili e amata se vaega o le a potopoto mo na o le tolu masina i le na o le faatasi i le vaiaso e faamaea ai iunite 1 e oo i le 3. O le faaaogaina o lenei auala e mafai ona fesoasoani i tagata aoao e tumau ai.

Manatua: Pe a faatulagaina se faatasiga faalevaega e le amata i le iunite 1, mafaufau e amata le faatulagaga o lesona a lau vaega i le lesona 1. O le a fesoasoani lenei mea e faasino ai tagata aoao i le auala e faaaoga ai le tusi lesona. Fefautuaai ma i latou o loo vaavaaia le polokalama ma mafaufau i manaoga o tagata aoao ma le malosiaga faalotoifale a o e faia nei faaiuga.

Afai e manaomia, e mafai e vaega ona aofia ai le silia ma le tasi le lesona i le taimi o se faatasiga faalevaega. Ina ia sili atu ona aoga faatasiga a vaega, e manaomia ona lava se taimi e maua e tagata aoao a o lei faapotopoto le vaega e faamaea ai le vaega o le "Suesuega Faaletagata Lava Ia" mo lesona taitasi.

Tagai i le "E faafia ona feiloai la'u vaega?" mo nisi faamatalaga e uiga i le faatulagaga o lesona ma le vave.

O le EnglishConnect 1 e manaomia ai le iloa faitautusi ma le tusitusi i le gagana moni o le tagata ma le tomai e faitau ai le alafapeta faa-Peretania ma upu amata faa-Peretania. O le EnglishConnect 2 e mo tagata aoao e mafai ona faia fuaiupu amata ma tali atu i fesili amata i le gagana Peretania. Ina ia filifili pe tatau ona auai se tagata aoao i le EnglishConnect 1 po o le EnglishConnect 2, e mafai ona e faaaogaina le faatalanoaga o le tomai tuugutu i le pepa faaaopoopo E.

O le EnglishConnect 3 o se mataupu e fesoasoani i tagata aoao e atiinae ai tomai faaleaoaoga i le gagana Peretania. Ina ia auai i le EnglishConnect 3, e tatau i tagata aoao ona talosaga ma ausia ni togi agavaa i le suega o le faatulagaga. E mafai e tagata aoao ona talosaga i le englishconnect.org/join.

E tele tulaga o le EnglishConnect e fesoasoani ai i tagata auai e alualu i luma. E fesoasoani le EnglishConnect 1 ma le 2 i tagata aoao e atiinae tomai o le gagana Peretania faafaigofie. O le EnglishConnect 3 o se matauu tulaga lua e fesoasoani i tagata aoao e atiinae ai tomai faaleaoaoga i le gagana Peretania. E fesoasoani i tagata aoao e saunia ai mo le BYU–Pathway Worldwide. (Aoao atili e uiga i le BYU–Pathway Worldwide i le byupathway.edu.)

O le EnglishConnect 3 o se mataupu e taugofie, i luga o le initaneti ma se faapotopotoga o talanoaga e faia i luga o le initaneti po o se falelotu i le lotoifale. O le EnglishConnect 3 e aofia ai punaoa mo le aoaoina i luga o le initaneti faatasi ai ma manatu faaalia patino i le faalogologo, tautala, faitau, ma le tusitusi. E mafai e tagata aoao ona agai i luma i le mataupu i lo latou lava mafai. E mafai e tagata aoao ona toe fai le EnglishConnect 3 i le tele o taimi e manao ai ina ia ausia a latou sini. O le faamaeaina o le EnglishConnect 3 e mafai ai e tagata aoao ona faamisi faasologa o le faavasegaga faa-Peretania pe a talosaga i le BYU–Pathway Worldwide.

Ina ia saunia mo le EnglishConnect 3, e tatau i tagata aoao ona faamaea le EnglishConnect 1 ma le 2—e aofia ai gaoioiga o le api o galuega, aemaise lava gaoioiga o le faitau ma le tusitusi. Uunaia tagata aoao o le EnglishConnect 2 e talosaga i le EnglishConnect 3 i le englishconnect.org/join.

O le EnglishConnect 3 e ofoina atu e ala i le BYU–Pathway Worldwide i le galulue faatasi ai ma taitai i le lotoifale ma faifeautalai o auaunaga a le Ekalesia. E mafai e taitai ona galulue faatasi ma pule o le uelefea ma le ola tutoatasi i la latou eria e tuuina atu le EnglishConnect 3 i o latou nofoaga.

Ua faatulaga lesona ina ia mafai ai e tagata aoao fou ona auai i se vaega o le EnglishConnect i soo se taimi. Afai e mananao tagata aoao e auai pe a uma ona amata vaega, faafeiloai i latou, tuu atu ia i latou le EnglishConnect 1 mo Tagata Aoao po o le EnglishConnect 2 mo Tagata Aoao (pe faasino ia i latou le auala e faaaoga ai le tusi lesona i le Potutusi o le Talalelei), ma fesoasoani ia i latou e auai. E mafai ona e fesoasoani po o se isi tagata aoao i tagata aoao fou e auai faatasi ma le vaega e ala i le faaali atu ia i latou o le auala e saunia ai mo le isi lesona. E mafai foi e tagata aoao ona filifili e toe faataitai se tulaga pe afai latou te manaomia nisi faataitaiga.

O nisi taimi e i ai luitau a tagata aoao e faigata ai ona auai i le vaega, ma e masani ona latou faatuai e toe foi mai ona o le maasiasi po o le fefe. Atonu latou te manatu ua tele naua mea ua latou misia ma ua le mafai ona latou mauaina. Aapa atu ma valaaulia tagata aoao e le o i ai e o mai i le isi lesona e tusa lava pe ua latou misia ni lesona. Ofo atu le lagolago ma le faamalosiau. Faamautinoa atu ia i latou ua faatulaga le EnglishConnect ina ia mafai ai e tagata aoao ona toe auai i soo se taimi. E mafai ona toe amata tagata aoao e ala i le auai i le vaega ma sauniuni mo le isi lesona. Mafaufau e valaaulia se tagata se toatasi pe sili atu o le vaega e faafesootai le tagata e le'i auai ma faailoa atu le lagolago.

Manatua: Aua nei faasoaina atu faamatalaga fesootai o se tagata e aunoa ma lana faatagaga tusitusia.

O nisi tagata aoao e manaomia se taimi tele e malamalama ai ma tautatala i se gagana. O nei tagata aoao o le a sili ona faamanuiaina mai le faatumuina o le vaega o le "Suesuega Faaletagata Lava Ia" a o lei auai i vaega taitasi o talanoaga. Valaaulia i latou e faataitai i lisi o upu ma faatulagaga o fuaiupu a o lei potopoto le vaega. I le taimi o le lesona, faapaga nei tagata aoao ma isi tagata aoao e mafai ona tuuina atu le faamalosiauga ma le lagolago. Uunaia tagata aoao uma e faia le tele o mea latou te mafaia ma talia mea sese o se vaega o le faagasologa o le aoaoina. E mafai foi ona e filifili e toe iloilo ma toe fai gaoioiga. Faamanatu i tagata aoao uma o le faatumuina o le vaega o le "Suesuega Faaletagata Lava Ia" a o lei auai i le isi vaega o talanoaga e sosoo ai e taua tele i lo latou alualu i luma.

A o e fegalegaleai ma tagata aoao, atonu e te matauina o nisi e malamalama lelei ma e faigofie ona faamaeaina gaoioiga faataitai. Mafaufau e luiina nei tagata aoao e faaloloto a latou aoaoga e ala i le faaaofia ai o nisi faamatalaga po o le faia o le gaoioiga lava e tasi i se isi ituaiga tulaga. Mo se faataitaiga, pe a faataitai e tagata aoao le feiloai atu i se tasi, fai atu ia i latou e faataitai le feiloai atu i se uo fou po o se pule fou. E mafai foi e nei tagata aoao ona faamautuina lo latou malamalama i le gagana Peretania e ala i le lagolagoina o tagata aoao o loo telegese le latou aoaoina. E mafai e tagata aoao uma ona faamanuiaina mai le aoaoina o se isi tagata ma fesoasoani i isi e faataitai le lisi o upu ma faatulagaga o fuaiupu i le gagana Peretania.

O le iai o tagata aoao e eseese tulaga o le tomai tautala i le gagana Peretania o se mea masani ma o se avanoa mo i latou e fesoasoani ai le tasi i le isi. O le fesoasoani o le tasi i le isi e mafai ona atiinae ai le faaaumea ma le tuputupuae. E tofu tagata uma ma se sao e ofoina atu. Mo se faataitaiga, o nisi tagata aoao e ono mafai ona fesoasoani i isi ia lagona le to'a ona ua latou iloa latou te faia foi ni mea sese. Faapaaga tagata aoao i ni auala eseese. E mafai ona faipaga tagata aoao ma se tasi i se tulaga talitutusa e fesoasoani ia i latou e faalautele faatasi o latou tomai. Pe mafai foi ona faipaga tagata aoao ma se isi tagata i se isi tulaga. O le tagata aoao maualalo o le a penefiti mai manatu faaalia ma le fesoasoani. O le tagata aoao maualuga le gafatia o le a penefiti mai le aoaoina o se tagata aoao ma faamalamalama atu i le gagana Peretania. Manatua, o le iai o se vaega e eseese tomai e tautatala ai i le gagana Peretania o se mea masani ma e mafai ona avea ma se avanoa matagofie mo tagata aoao e manuia ai mai le fesoasoani o le tasi i le isi.

Nai lo le tuuina atu o faatonuga uumi o le kalama po o le faaaluina o le tele o le taimi e talanoa ai e uiga i tulafono, toe faasino atu tagata aoao i le faatulagaga o fuaiupu. O le a aloese tagata aoao mai le tele o mea sese e ala i le mulimuli i faatulagaga o fuaiupu. E sili atu ona aoga le aoao e ala i le faataitaia o le gagana nai lo le talanoa e uiga i le gagana. Soo se faamalamalamaga e uiga i le kalama e tatau ona faigofie, puupuu, ma faatinoina. Afai e te aoaoina atu se mataupu faavae, tuuina atu ni fuaiupu faataitai ma valaaulia tagata aoao e faataitai le faaaogaina o le mataupu faavae. E sili atu ona aogā i tagata aoao le faalogo ma le faataitai i le gagana Peretania.

Aua le faaaluina le tele o le taimi e faasa'o ai le faaleoina. Faamanatu i tagata aoao o le malamalama e sili atu ona taua nai lo le atoatoa o le faaleoina. Uunaia tagata aoao e faataitai le faaleoina i le taimi o a latou suesuega patino ina ia mafai ona latou faataitai i lo latou lava vave. Ia manatua afai e soona popole tagata aoao i a latou faaleoina, atonu latou te faatuai e faataitai se talanoaga. Uunaia tagata aoao e faaaoga le faaleoga i luga o le initaneti i le englishconnect.org/learner/resources.

Faaaoga le meafaigaluega QuickReg (quickreg.englishconnect.org) e resitala ai ma pulea lau vaega o le EnglishConnect. O le QuickReg o se meafaigaluega e resitala ai vaega ua saunia e Le Ekalesia a Iesu Keriso o le Au Paia o Aso e Gata Ai. E mafai ona e faaaogaina le QuickReg e:

• Faatu se vaega: Filifili le aso, taimi, ma le nofoaga o lau vaega.
• Pulea se vaega: Maimoa i faamatalaga o tagata auai ma faafou faamatalaga o vaega.
• Valaaulia tagata e auai: O le a lisiina lau vaega i luga o le initaneti i le englishconnect.org/join. E mafai ona e faasoaina atu se sootaga faaupega tafailagi e valaaulia ai tagata e resitala mo lau vaega.
• Tufatufa atu tusipasi: I le faaiuga o lau vaega, e mafai ona e faaaogaina ma lolomi ia tusipasi.

EnglishConnect 1 ma le 2: I le faaiuga o le vaega, e mafai e tagata aoao ona maua tusipasi o le auai. E mafai e taitai, tagata tomai faapitoa, po o faiaoga ona tufatufa atu tusipasi. O nisi atunuu e ono le talia le tufatufa atu o tusipasi o le EnglishConnect. Faamolemole iloilo tulaga manaomia faaletulafono i le lotoifale a o lei tauaaoina atu tusipasi (tagai i le englishconnect.org/leader/approved-locations).

Manatua: Ina ia maua ma tufatufa atu tusipasi, e tatau ona resitala lau vaega i le QuickReg i le quickreg.englishconnect.org. (Tagai i le "E faapefea ona ou resitala ma pulea la'u vaega o le EnglishConnect?" i le vaega lenei o le FAQ.)

EnglishConnect 3: E mafai e tagata aoao ona ausia tusipasi o le faamaeaina pe a latou faamaeaina tulaga manaomia i le mataupu. O le faamaeaina o le EnglishConnect 3 e mafai ai e tagata aoao ona faamisi faasologa o le faavasegaga faa-Peretania pe a talosaga i le BYU–Pathway Worldwide.

O se taulaiga i le aoaoina e faavae i le faatuatua o se tasi lea o mea e tulaga ese ai le EnglishConnect. E mafai ona e faaaofia ai tagata mai tapuaiga eseese e ala i le fesoasoani ia i latou e mafaufau pe faapefea ona faataitai le mataupu faavae o le aoaoina ia i latou. E mafai ona e faaaogaina le "Lisi o Upu o Mataupu Faavae o le Aoaoina" i tusi lesona a le tagata aoao o le EnglishConnect e fesoasoani ai ia i latou ia malamalama i faaupuga o le talalelei. A o taialaina e le Agaga, mafaufau e valaaulia i latou e faasoa mai mea ua latou aoaoina a o e talanoaina le mataupu faavae o le aoaoina. Ia faaalia i taimi uma le faaaloalo mo talitonuga o isi a o faasoa lo latou faatuatua faapea e mafai e le Atua ona fesoasoani ia i latou e aoao le gagana Peretania.

O le faasoa atu o se vaega masani o vaega o talanoaga, ae o nisi taimi e ono talanoa tele ai se tagata e toatasi ma e foliga mai e mumusu isi e faasoa atu. E mafai ona fesoasoani le talanoa taitoatasi ma lena tagata, i fafo atu o le faapotopotoga a le vaega. Faamatala mea o loo e matauina ma pe faapefea ona e manatu o loo aafia ai le vaega. Fai atu i le tagata e faasoa mai soo se atugaluga ma vaai pe mafai ona lua malilie i se fofo o le a fesoasoani i tagata uma o le vaega e auai.

Atonu e manaomia ona e tolopoina le lesona. Fefautuaai ma i latou o loo vaavaaia le polokalama ma mafaufau i manaoga o tagata aoao ma le malosiaga faalotoifale a o e faia nei faaiuga.

Fai atu i se isi faiaoga e taitai le vaega pe a e le auai. Ia mautinoa o loo i ai ni tagata matutua se toalua o loo auai. Valaaulia se isi tagata matua o le vaega e aoao atu pe a manaomia.

Anomea mo Tagata Aoao
O le a manaomia e tagata aoao le faaaogaina o le EnglishConnect 1 mo Tagata Aoao po o le EnglishConnect 2 mo Tagata Aoao a le o le kopi faaeletoroni i le Potutusi o le Talalelei po o le kopi lolomi i le faleoloa faaupega tafailagi a le Ekalesia i le store.ChurchofJesusChrist.org. O loo maua foi punaoa faaopoopo e faaleleia ai lo latou aoaoina, e aofia ai api o galuega ma gaoioiga i luga o le initaneti. Mo faamatalaga o punaoa uma o loo maua e tagata aoao, tagai i le "O a mea e faaaoga e tagata aoao ma faiaoga mo le EnglishConnect?"

Anomea a le Faiaoga
E tatau i faiaoga ona suesue i le EnglishConnect mo Faiaoga i le Potutusi o le Talalelei faapea foi ma isi punaoa mo aoaoga i le englishconnect.org/sm/punaoa/kosi.

E mafai e tagata o le ekalesia ma faifeautalai ona amata vaega o le EnglishConnect i lalo o le taitaiga a taitai perisitua i le lotoifale. Tagai i le Taiala o le Faatinoga a le EnglishConnect mo nisi faamatalaga.

Afai e tuai ona taunuu mai se tagata aoao, valaaulia se isi tagata aoao e fesoasoani ia te ia e auai i le gaoioiga ua oo iai.

Afai e auai se tagata aoao i le vaega pe a maea le lesona muamua, ia faaalu se taimi a o lei faia pe mulimuli atu foi e faafeiloai ma le fiafia le tagata fou o loo aoaoina. Valaaulia se isi tagata aoao e fesoasoani ia te ia ia malamalama i le mataupu ma saunia mo le isi lesona.

Valaaulia tagata aoao e tauloto le lis o upu a o lei amataina le lesona. E mafai ona latou faaaogaina punaoa i luga o le initaneti e aoao ai le uiga ma le faaleoina o upu taitasi. I le amataga o le lesona, tuu atu i tagata aoao e galulue taitoalua e iloilo le lisi o upu mo ni nai minute. Aua le faaaluina se taimi e soona faaalu se taimi i le lisi o upu - o le a sili atu ona manatua e tagata aoao upu a o latou faaaogaina i gaoioiga o talanoaga.

Faatapulaa le aofaiga o le taimi e te faaaluina e iloilo ai le lisi o upu ma faatalanoaina le kalama. O le tele o le taimi e tatau ona faaaluina e fesoasoani ai i tagata aoao e faataitai gaoioiga o talanoaga i ni vaega toalaiti po o ni paga.

E leai ni vaega e mafai ona faia pe a i ai ni tamaiti laiti ma e leai ni tagata matutua se toalua e i ai. E faapena fo'i, e leai se tagata matua e mafai ona galue na o ia, taitoatasi, ma se tamaitiiti laitiiti. O nei tulafono e mo le puipuiga o tagata uma.

O le EnglishConnect o se polokalama ua saunia e Le Ekalesia a Iesu Keriso o le Au Paia o Aso e Gata Ai e aoao ai i le gagana Peretania . O le faamoemoega o le EnglishConnect o le fesoasoani lea i tagata taitoatasi ia faateleina le ola tutoatasi faaleagaga ma faaletino e ala i le atinae o tomai faa-Peretania i se siosiomaga o le faatuatua, faaaumea, ma le tuputupuae. E faaaoga e taitai, faiaoga, ma tagata aoao le EnglishConnect e fesoasoani ai i fanau a le Atua ia:

• Ola i le talalelei a Iesu Keriso. I le EnglishConnect, e faaaoga ai e tagata auai mataupu faavae o le aoaoina "e ala i le suesue ma le faatuatua foi" (Mataupu Faavae ma Feagaiga 88:118). E faamalosia e faiaoga ma tagata aoao lo latou faatuatua a o latou sailia ma maua le fesoasoani a le Alii.
• Tausi i latou e manaomia le fesoasoani. O tomai i le gagana Peretania e mafai ona faalauaitele ai avanoa mo le ola tutoatasi ma le auaunaga. E fesoasoani le EnglishConnect i tagata auai e saunia mo auaunaga, galuega, ma avanoa faaleaoaoga. E le gata i lea, e auauna atu ma alolofa le tasi i le isi a o latou aoao atu ma aoao faatasi.
• Valaaulia tagata uma e talia le talalelei. I vaega o le EnglishConnect, e aoao ma faaaoga e tagata auai mataupu faavae o le talalelei ma fausia ni faauoga. I le EnglishConnect atoa, e tele avanoa e maua e tagata auai e mulimuli ai i le Agaga a o latou alolofa, faasoa atu, ma valaaulia isi e iloa faamanuiaga o le talalelei.

O le aoaoina o le gagana faaperetania e mafai ona matuai faateleina ai avanoa o se tagata mo se galuega, aoaoga, ma le auauna atu. I atunuu e le o le gagana moni le gagana Peretania, o tagatanuu e tautatala faaPeretania e mafai ona maua ni totogi maualuluga atu e 30-50% (https://www.weforum.org/agenda/2017/03/the-link-between-english-and-economics; https://hbr.org/2013/11/countries-with-better-english-have-better-economies). 

I atunuu e tautatala faa-Peretania, o tagata malaga ma tagata sulufai e aoaoina le gagana Peretania e sili atu ona mafai ona maua ni galuega, maua ni tausiga faalesoifua maloloina, faaaoga avanoa faaleaoaoga, ma fegalegaleai ma le nuu (https://www.census.gov/hhes/socdemo/language/data/acs/PAA_2005_AbilityandEarnings.pdf).

E te faia se matafaioi taua i le faatuina o le vaaiga mamao mo le EnglishConnect i la outou eria. Faamolemole faitau ma mulimuli i faatonuga o loo i le Taiala o le Faataunuuga o le EnglishConnect.

E faia e faiaoga se matafaioi taua i le valaauliaina o le Agaga ma le faafaileleina o le faatuatua, faaaumea, ma le tuputupuae i vaega o le EnglishConnect. E le manaomia ona avea i latou ma tagata tomai faapitoa i le gagana Peretania pe i ai foi se poto masani i le aoao atu. E le manaomia ona latou tutusa le gagana tautatala ma tagata aoao. O lesona EnglishConnect ua faatulaga e faaaoga ai mataupu faavae faamaonia o le aoaoina o gagana, ma o le a faamanuiaina faiaoga a o latou taitaia ma le alofa tagata aoao i lesona. E fesoasoani faiaoga i tagata aoao ia latalata atili atu i le Atua e ala i le aoaoina o le gagana Peretania.

Ua i ai i faiaoga lelei le:

• Naunautai, fiafia, ma le naunautai mo le aoaoina o le gagana Peretania.
• Alofa ma le onosai mo tagata aoao ma se manao malosi ia vaai ia latou manuia.
• O se uiga lelei ma le mautinoa.
• Faatuatuaina ma le avanoa e taitai ai vaega.

Talu ai o tagata aoao o le EnglishConnect e mafai ona aofia ai tamaiti laiti, e tatau i taitai perisitua i le lotoifale ona faatalanoa faiaoga taitasi e ono i ai ma iloilo a latou pepa faamaumau mo faamatalaga a o lei tuuina atu se valaauga. O vaega e i ai tamaiti laiti e tatau ona i ai ni tagata matutua se toalua o loo i ai ma mulimuli i aiaiga faavae a le Ekalesia mo le puipuia o le autalavou.

E mafai ona aoaoina faiaoga e se tagata tomai faapitoa mo le ola tutoatasi, taitai perisitua, po o se isi faiaoga. Latou te aoaoina faiaoga e faaaoga ai le EnglishConnect mo Faiaoga ma punaoa i le englishconnect.org/leader-and-teacher-resources. E tatau ona tuuina atu i faiaoga se kopi o le tusi lesona ma le api galuega a le tagata aoao (tagai i le "O a mea e faaaoga e le tagata aoao ma le faiaoga?"). E mafai ona uunaia faiaoga e fono e le aunoa e fefautuaai faatasi, faasoa atu ni faiga sili ona lelei, tali fesili a le tasi ma le isi, ma iloilo ia punaoa mo aoaoga.

E fautuaina le i ai i vaega taitasi le itiiti ifo ma le toalua o ni faiaoga. O le ala lena e mafai ai ona latou aoao atu pe sui ai e le tasi le isi pe afai e leai se tasi pe ma'i.

TAUA: E tatau i vaega o le EnglishConnect ona mulimuli i aiaiga faavae a le Ekalesia e faapea, ia le itiiti ifo ma le toalua ni tagata matutua faatuatuaina e tatau ona i ai i taimi uma o faatasiga a vaega. Afai e na o le tasi le faiaoga, ona tofi lea o se tagata matua o le vaega e auai i lesona taitasi. Aua le faia ni vaega pe afai e itiiti ifo ma le toalua ni tagata matutua e nafa ma le auai.

Anomea mo Tagata Aoao
O le a manaomia e tagata aoao le faaaogaina o le EnglishConnect 1 mo Tagata Aoao po o le EnglishConnect 2 mo Tagata Aoao a le o le kopi faaeletoroni i le Potutusi o le Talalelei po o le kopi lolomi i le faleoloa faaupega tafailagi a le Ekalesia i le store.ChurchofJesusChrist.org. O loo maua foi punaoa faaopoopo e faaleleia ai lo latou aoaoina, e aofia ai api o galuega ma gaoioiga i luga o le initaneti. Mo faamatalaga o punaoa uma o loo maua e tagata aoao, tagai i le "O a mea e faaaoga e tagata aoao ma faiaoga mo le EnglishConnect?"

Anomea a le Faiaoga
E tatau i faiaoga ona suesue i le EnglishConnect mo Faiaoga i le Potutusi o le Talalelei faapea foi ma isi punaoa faaleaoaoga i le englishconnect.org/leader-and-teacher-resources.

E mafai e iunite ma misiona i le lotoifale ona iloa pe o le a latou totogia le tau o mea e lolomi ai pe o le a totogi foi e tagata aoao a latou lava tusi lesona. E mafai e tagata aoao ona okaina sao ia tusi lesona i le store.churchofjesuschrist.org.

O le faamoemoega o le EnglishConnect o le fesoasoani lea i tagata aoao ia faateleina lo latou ola tutoatasi faaleagaga ma faaletino a o latou sailia le fesoasoani a le Alii e aoao ai i le gagana Peretania. O le aoaoina o le gagana Peretania e mafai foi ona faalautele ai o latou avanoa faaleaoaoga ma faalegaluega. Ua faatulaga mataupu o le EnglishConnect e fesoasoani ai i tagata aoao e faaaoga mataupu faavae o le talalelei a o latou galulue faatasi e ausia a latou sini e aoao ai.

O le a e iloa o loo manuia taumafaiga a faiaoga pe a latou:

• Valaaulia le Agaga e ala i molimau, tatalo, ma le faailoa atu o le alofa ma le faamalosiauga.
• Tuuto atu le 20 i le 30 minute o le taimi faalevaega e talanoaina ai le mataupu faavae o le aoaoina mai le lesona.
• Faaalu le tele o le taimi faalevaega e fesoasoani ai i tagata aoao e auai i gaoioiga faataitai o le tautala felafolafoai.

O le a e iloa o loo faamanuiaina tagata aoao pe a latou:

• Auai pea ma auai malosi i sauniga faalevaiaso a vaega.
• Aoao le tasi i le isi, faailoa atu le faatuatua, ma faasoa atu molimau.
• Faatino i le faatuatua e suesue ma faataitai le gagana Peretania i aso taitasi i fafo atu o la latou vaega.

E toatele tagata i le lalolagi atoa o loo feagai ma faafitauli i le aoaoina o le gagana Peretania e aofia ai le tau, mamao, taimi, masalosalo ia te oe lava, ma le auala e maua ai. E mafai e taitai o le Ekalesia ona faaaoga le EnglishConnect e faatoilalo ai nei faafitauli. Ua saunia e le EnglishConnect se avanoa tulaga ese mo tagata aoao e atiinae ai tomai faa-Peretania i se siosiomaga e taulai atu i le talalelei. O tagata aoao e ausia taunuuga o le mataupu o le a faalauteleina o latou avanoa mo galuega, auaunaga, ma aoaoga—aemaise lava e ala i le BYU-Pathway Worldwide.

O punaoa EnglishConnect e puipuia e le tulafono o le pule tau fatuga ma e le tatau ona fetuunai e aunoa ma se faatagana. Tagai i le vaega "Pepa Faaopoopo A: Faamatalaga Faaletulafono" mo faamatalaga i le talosagaina o le faatagana e fetuunai ai punaoa.

O le tele o faalapotopotoga e ofoina atu uma le EnglishConnect 1 ma le 2. Afai e le mafai, e fautuaina le amata ona e ofoina atu le EnglishConnect 1 ma faalautele atu i le EnglishConnect 2 a o faateleina lou gafatia.

Faatasi ai ma anomea ua faafouina na faalauiloa mai i le 2024, ua suia ai tulaga manaomia o faiaoga na muamua atu ina ia mafai ai e le toatele o tagata ona maua le avanoa e avea ai ma faiaoga o le EnglishConnect. I fesili o loo lisiina i lalo, faamolemole toe iloilo le "O ai e tatau ona ou valaauina o ni faiaoga?" e aoao atili ai.

E lē faigofie le aoaoina o se gagana. E manaomia ai taumafaiga faifai pea, onosai, ma le faatuatua. E mafai ona e fesoasoani e ala i le faaalia o le faatuatua, tuuina atu o faamalosiauga, ma tulitatao ma le alofa.

O le EnglishConnect o se taumafaiga na saunia e Le Ekalesia a Iesu Keriso o le Au Paia o Aso e Gata Ai. Na amata o se vaega o le taumafaiga faaleaoaoga i le lalolagi atoa ma o loo faaauau pea o se taumafaiga tuufaatasi i le va o le Polokalama o Aoga a le Ekalesia, Uelefea ma le Auaunaga mo le Ola Tutoatasi, ma le Vaega o Faifeautalai. E faitau afe tagata ua auai i le EnglishConnect ma ua faamanuiaina mai le avanoa tulaga ese e aoao ai le gagana Peretania i se siosiomaga o le faatuatua, faaaumea, ma le tuputupuae.

E toatele tagata i le lalolagi atoa o loo feagai ma faafitauli i le aoaoina o le gagana Peretania e aofia ai le tau, mamao, taimi, masalosalo ia te oe lava, ma le auala e maua ai. E mafai e taitai o le Ekalesia ona faaaoga le EnglishConnect e faatoilalo ai nei faafitauli. Ua saunia e le EnglishConnect se avanoa tulaga ese mo tagata aoao e atiinae ai tomai faa-Peretania i se siosiomaga e taulai atu i le talalelei. O tagata aoao e ausia taunuuga o le mataupu o le a faalauteleina o latou avanoa mo galuega, auaunaga, ma aoaoga—aemaise lava e ala i le BYU-Pathway Worldwide.

E faagaoioia le EnglishConnect i lalo o le taitaiga a le perisitua e fesoasoani ai i le galuega o le faaolataga ma le faaeaga a le Atua. E mafai ona faatinoina le EnglishConnect e uarota, siteki, fono faamaopoopo, misiona, ma eria. Latou te faia lenei mea e ala i le:

• Tuuina atu o Vaega EnglishConnect 1 ma le 2 : E mafai ona faatulagaina vaega o le EnglishConnect ma faatautaia e pei o isi vaega o le ola tutoatasi. O lona uiga e o le puleaina o le EnglishConnect 1 ma le 2 ua faamatuu atu i se komiti atofaina o le ola tutoatasi po o se isi komiti atofaina.
• Fesootaiina o Tagata Aoao i Vaega e 3 o le EnglishConnect: O le EnglishConnect 3 e faatulagaina ma faatautaia e le BYU–Pathway Worldwide. E faagaioi e faifeautalai o auaunaga a le Ekalesia ia vaega o le EnglishConnect 3.

Tagai i le Taiala o le Faatinoga a le EnglishConnect mo nisi faamatalaga.

O vaega faafesagai i falesa o le Ekalesia ua fautuaina e tuuina atu avanoa e faaaumea ai. Afai o le faaaogaina o fale o le Ekalesia o se luitau mo tagata auai, mafaufau e tuuina atu ni vaega i luga o le initaneti. O le "Taiala i le Taitaiina o Vaega i Luga o le Initaneti" ma le "Taiala mo Tagata Auai i Vaega i Luga o le Initaneti" e mafai ona fesoasoani i taitai, faiaoga, ma tagata aoao e fausia se siosiomaga musuia e aoao ai i luga o le initaneti. O loo maua lesona mo aoaoga faaaoga ai le initaneti i le englishconnect.org/sm/punaoa-mo-faiaoga-ma-taitai.

O le tele lava o vaega e potopoto faatasi pe faalua i le vaiaso, ae o lesona e tusia ina ia mafai ona feiloai soo ai vaega pe a manaomia. Filifili se aso ma se taimi e sili ona aoga mo tagata aoao ma faiaoga. Manatua e manaomia e tagata aoao se taimi e faamaea ai gaoioiga o suesuega patino a o lei faia lesona taitasi.

O le tele lava o vaega e potopoto mo le 90 minute, ae e mafai ona potopoto vaega mo se taimi ese pe a manaomia.

E tele vaega o loo faifai pea, o lona uiga latou te toe amata i le lesona 1 pe a uma le tusi lesona. O isi vaega e na o le faatasi ona faia le tusi lesona pe na o se vaega o iunite o loo i le tusi lesona e aofia ai.

O le taimi nei, e leai ni togi aloaia o mataupu o le EnglishConnect. Ae peitai, o le mataupu aoaoina o le EnglishConnect 3 ua faatulagaina ina ia saunia ai tagata aoao mo le taunuuga lelei i le BYU-Pathway Worldwide.

O tagata auai i le EnglishConnect 1, 2, ma le 3 e tatau ona le itiiti ifo ma le 11 tausaga le matutua. E tatau i tamaiti laiti ona auina atu se pepa faatumu o le maliega a matua.

Ua fautuaina tagata mai tapuaiga eseese ina ia auai. E tatau i tagata o le ekalesia ona faaalia i taimi uma le faaaloalo mo talitonuga o isi a o faasoa lo latou faatuatua faapea e mafai e le Atua ona fesoasoani ia i latou e aoao le gagana Peretania.

O le QuickReg o se meafaigaluega ua faamaonia e le Ekalesia e pulea ai vaega o le ola tutoatasi. Fausia ni vaega i le QuickReg e ala i le alu i le quickreg.englishconnect.org. Ona faaauau lea ona faaaoga le QuickReg e:

• Faasalalau vaega
• Sui le aso, taimi, ma le nofoaga o vaega
• Lolomi tusipasi o tagata auai
• Sui le tulaga o se tagata aoao
• Faaiu vaega

Tagai i le aoaoga faamasani a le QuickReg i le englishconnect.org/quickreg mo aoaoga.

Manatua: Ina ia faaaoga le QuickReg, e tatau i se tagata ona (1) i ai se valaauga i le Ekalesia ma (2) ia faamaumauina o latou valaauga i le Punaoa mo Taitai ma Failautusi.

EnglishConnect 1 ma le 2: E mafai e faiaoga ma tagata tomai faapitoa mo le ola tutoatasi ona lolomi ma tuuina atu tusipasi o le auai i tagata aoao sa resitala i le QuickReg.

Manatua: Ua na o se faailoga o le auai. O le EnglishConnect 1 ma le 2 e le o ni mataupu aloaia faaleaoaoga ma e le tauaaoina atu ai ni togi i le iunivesite.

EnglishConnect 3: I le faaiuga o le mataupu, e mafai e tagata aoao ona ausia se tusipasi o le faamaeaina e faavae i a latou auai i le mataupu.

E mafai ona valaauina pe tofia ia faiaoga EnglishConnect 1 ma le 2. E tatau ona filifili lenei mea e taitai o le lotoifale.

O faiaoga o le EnglishConnect 1 ma le 2 e masani lava ona valaauina pe tofia e taitai i le lotoifale. Pe a tuuina atu le valaauga po o le tofiga, e tatau i taitai ona faasino atu faiaoga i le Tusi Lesona a le Faiaoga ma punaoa mo aoaoga i le englishconnect.org/leader-and-teacher-resources.

I eria e le o i ai ni vaega o siteki po o uarota o le EnglishConnect, e mafai e taitai misiona ona fuafua faatasi ma taitai perisitua i le lotoifale e fai atu i faifeautalai e aoao vaega a o saunia e taitai o le Ekalesia i le lotoifale ia tagata o le ekalesia e faataunuu lenei matafaioi. E tatau i taitai misiona ma faifeautalai ona faaaoga faamatalaga o loo i lenei taiala ma tuufaatasia a latou taumafaiga ma taumafaiga a taitai ma tagata o le ekalesia i le lotoifale (tagai i le "Paaga Faamisiona" i le Taiala o le Faatinoga o le EnglishConnect mo nisi faamatalaga).