Tumong namo nga tabangan ang mga partisipante sa pagpalapad sa mga oportunidad pinaagi sa pagpauswag sa kahanas sa Iningles diha sa usa ka palibot diin naay pagtuo, panag-uban, ug paglambo.
Ang dugang nga kahanas sa Iningles makapalapad sa mga oportunidad sa serbisyo, trabaho, ug edukasyon. Pinaagi sa EnglishConnect, makabaton kag kompiyansa sa pagpakig-estorya sa tibuok kalibotang komunidad ug sa paggamit og Iningles sa trabahoan. Ang mga tigkat-on nga nakakompleto sa EnglishConnect 3 mas andam sa pagkuhag degree pinaagi sa BYU-Pathway Worldwide.
Hugot nga Pagtuo
Sa EnglishConnect, milihok kita sa hugot nga pagtuo sa pagpangita sa tabang ug kusog sa Dios sa pagkat-on og Iningles. Sa tibuok natong kurikulum, atong gamiton ang espirituhanong baruganan sa pagkat-on nga makatabang nato nga masabtan ang atong tinuod nga potensyal ug ang abilidad sa Dios sa pagdugang sa atong kapasidad sa pagkat-on.
Panag-ubanay
Sa EnglishConnect nga mga grupo sa panag-istoryahanay, among gipalambo ang panaghigalaay ug nagtukod og suporta nga network nga nagbayaw ug nagdasig kanamo. Samtang kita tingali gikan sa lain-laing mga kaagi, magkauban kita makadugang sa atong pagsalig, makakat-on gikan sa atong mga sayop, ug magsaulog sa atong pag-uswag.
Pag-uswag
Ang EnglishConnect dili lamang pagkat-on sa Iningles; mahitungod usab kini sa pagdugang sa atong kapasidad sa pagkat-on ug pagtudlo. Bisag asa ta magsugod, kita magkugi ug magtinabangay uban sa Dios aron makab-ot ang atong mga tumong. Kita molihok nga may hugot nga pagtuo sa pagpraktis sa Iningles adlaw-adlaw, sa pagpauswag sa atong mga kahanas, ug sa pag-abli sa mga pultahan ngadto sa makapalipay nga mga posibilidad, sama sa...- Mas maayong panarbaho
- Mga kahigayonan sa taas nga edukasyon
- Mga kahigayonan sa serbisyo
- Bag-ong panaghigalaay
Unom ka Prinsipyo sa Pagkat-on
1. Anak ka sa Dios
Sa EnglishConnect, nahibal-an nato nga anak sa Dios ang matag partisipante nga naay walay-kataposang potensyal. Dihang atong masabtan ang atong tinuod nga potensyal, puwede tang makig-partner sa Dios sa pagbuhat sa mga butang nga daw imposible—apil ang pagkat-on og Iningles.
2. Pagpakitag hugot nga pagtuo kang Jesukristo
Ginadapit namo ang mga nagtuon nga magtuon bahin kang Jesukristo ug magpakitag hugot nga pagtuo Kaniya. Pinaagi sa grasya ug gahom ni Jesukristo, makadawat tag kusog ug tabang sa pagkat-on ug pagbag-o.
3. Mahimong responsable
Ingong mga anak sa Dios, makapili ta kon unsay mahitabo nato sa umaabot. Bisag matabangan ta sa uban, kinahanglan tang mopili sa pagbuhat sa buluhaton nga gikinahanglan aron makab-ot ang atong mga tumong sa pagkat-on.
4. Higugmaa ug tudloi ang usag usa
Usa sa pinakanindot nga bahin sa EnglishConnect mao ang kasinatian sa pagkat-on uban ang among mga grupo sa panag-estorya. Samtang kita maghinigugmaay, magtinudloay, ug magkat-on nga magkauban, ginadapit nato ang tabang sa Dios, ug mouswag ang atong katakos.
5. Ayawg surender
Ang pagkat-on ug pinulongan nagkinahanglag panahon, paningkamot, ug paglahutay, pero wala ta mag-inusara. Makatabang nato ang Dios sa pagbaton og kusog ug kaisog sa pagpadayon aron makab-ot ang atong mga tumong.
6. Pagpagiya sa Ginoo
Ang pagpagiya sa Ginoo pinaagi sa pag-ampo makatabang nato sa pagsusi sa atong pag-uswag ug sa pag-focus sa atong mga paningkamot. Samtang mangayo ta sa iyang giya, makita nato ang mga solusyon sa atong mga problema, ug makaya nato ang atong mga kalisdanan.